PREMIO LINGUALAXE PARA ACHEGO
O
Equipo de Normalización Lingüística Balbordo concedeulle o
Premio Lingualaxe á Asociación de Comerciantes, Hostaleiros e
Empresarios de Gondomar (ACHEGO) como recoñecemento polo uso da
nosa lingua nas actividades, documentación e publicidade da
asociación e a súa contribución ao proceso de normalización
lingüística no ámbito económico e comercial no Val Miñor. O
acto de entrega deste galardón vaise celebrar mañá, venres, 2
de xuño, ás 22,30h no café Rañolas, de Gondomar, e contará
coa actuación dun grupo musical formado por alumnado de 1º e 2º
de Bacharelato do IES Auga da Laxe, acompañados polo seu
profesor, Sergio Álvarez.
Coa
entrega deste novo galardón, o ENL Balbordo ponlle fin a esta
inciativa dos Premios Lingualaxe que nacía en xaneiro do ano
2004 co obxectivo de distinguir aquelas empresas e
establecementos comerciais do Val Miñor que destacan polo uso
do galego nas súas actividades, nun esforzo por recoñecer
publicamente a aposta que estes establecementos fan nun ámbito
no que a normalización do uso da nosa lingua ten aínda moito
camiño por andar. Nestes dous anos, recibiron o premio
Lingualaxe o Café Rañolas; o lavado de coches “O Albor”
(xa desaparecido); a perruqería Susana Domínguez, de Vincios;
a peixería Xanela do Mar, da Ramallosa; Fruitas Vilar,
orixinaria de Baiona aínda que con tendas por toda a comarca;
Kerkus xardinería; a empresa de enxeñería e topografía
Vicente Álvarez, de Vincios; o Pazo da Escola, de Mañufe; e
Zaloira Moda, de Gondomar.
Coa entrega deste último galardón
a ACHEGO pretendemos recoñecer publicamente o uso que a
asociación fai do noso idioma e tamén animar a todos os
comerciantes e empresarios de Gondomar que aínda non usan o
galego nos seus respectivos negocios a que vaian incorporando o
noso idioma nas súas actividades como unha forma máis de
proximidade e de mellora na atención aos seus clientes.