Teano

Grecia, século VI a.C.

Segundo a maioría das fontes que nos chegaron, foi a esposa de Pitágoras e membro da escola pitagórica. Escribiu tratados sobre os inconmesurábeis e estudos de moralidade. No estudo das proporcións traballou co número áureo:

 

Á morte de Pitágoras sucedeulle na dirección da escola pitagórica.

Pregunta: O número áureo tamén se chama divina proporción pola beleza das figuras que manteñen esa regularidade. No ser humano, a relación entre a distancia da cabeza ao embigo e do embigo aos pés aproxímase á divina proporción. Se unha persoa que cumpre as proporcións áureas mide 90 cm da cabeza ao embigo, ¿cal será a súa estatura total?

Elena Piscopia

Venecia, 1646 – 1684

É a primeira muller que consegue un doutorado. Nun principio quixo facelo sobre teoloxía, pero a universidade de Padua negouse a admitir que unha muller o conseguise así que se doutorou en filosofía. A expectación foi tal que en vez de ler a súa tese na universidade tivo que facelo na catedral para que coubesen todos os asistentes. Ensinou matemáticas na Universidade de Padua.

 

 

Pregunta: Dixo Karl Weierstrass: Un matemático que non é tamén algo poeta nunca será un matemático completo. Seguramente por iso hai tantos problemas que propuxeron mediante poemas. ¿Saberías resolver este? A unha cerdeira subín onde cereixas había cereixas non recollín, cereixas non deixei: ¿cantas cereixas había?

Ada Byron

Inglaterra, 1815 - 1852

Filla de Lord Byron, non volveu velo despois de que a súa nai solicitara o divorcio cando ela tiña tres anos. Foi educada na ciencia porque a súa nai non soportaba a idea de que a súa filla se convertera en poeta, pero baixo as ensinanzas de Mary Somerville descubriu a parte humana das matemáticas. Foi a precursora do software coa súa participación nos Papeis Menabrea. Hoxe en día hai unha linguaxe de programación que leva o seu nome: ADA

 

Pregunta:   Ada utilizou a sucesión de Fibonacci para aplicar as súas conclusións pola forma de construírse que ten a partir dos termos anteriores: 1, 1, 2, 3, 5, 8, 13, 21, 34... Cada termo, a partir do terceiro, obtense sumando os dous anteriores. Esta sucesión ten moitísimas propiedades; unha delas é que ao dividir un termo entre o anterior, cando o facemos con termos moi grandes, o resultado achégase moito a un deses números que non poden expresarse como unha fracción. ¿Cal é?

Sofía Kovalevskaya

Rusia, 1850 – Suecia, 1891

Tivo que casar para poder saír de Rusia a estudar e, aínda que ao principio Weierstrass non quería dar clase a unha muller, ao ver a súa capacidade converteuse no seu mellor defensor. Investigou sobre moitos aspectos das matemáticas, sendo os máis coñecidos os traballos sobre ecuacións diferenciais e sobre os aneis de Saturno.

 Loitou por dar clases remuneradas, conseguíndoo en Suecia, pero morreu a consecuencia dunha gripe, sen apenas saborear o seu triunfo.

 

Pregunta: Recorda que a derivada ten que ver co cambio dunha función. Dada esta gráfica:   ¿Poderías dicir cal das dúas seguintes corresponde á derivada?