Agustín Fernández Paz no
instituto
O
martes, 20 de decembro, ás 20.00h, tivo lugar na biblioteca do
IES Auga da Laxe unha conferencia do escritor Agustín
Fernández Paz, que falou sobre a influencia da lectura na
formación dos rapaces e a importancia das familias no apoio á
creación de hábitos lectores. Está charla-coloquio foi especialmente dirixida ás nais e pais do alumnado do centro, aínda
que estivo aberta a todas as persoas que desexen asistir.
A
conferencia enmarcouse dentro do programa de actividades de
dinamización da lectura que a biblioteca do IES Auga da Laxe
está a desenvolver baixo o lema Saber abre camiños e eses
camiños pasan pola biblioteca, un proxecto que foi
seleccionado no presente curso dentro do Plan de Mellora de
Bibliotecas Escolares da Consellería de Educación e que inclúe
distintos tipos de actividades encamiñadas a conseguir un
mellor aproveitamento dos fondos da biblioteca, unha maior
utilización dos mesmos nas actividades académicas por parte do
profesorado e do alumnado e unha dinamización da biblioteca
como espazo para o lecer, para a busca de información e, en
xeral, para a mellora nos procesos de aprendizaxe.
Como
complemento ao labor de implicación das familias no traballo de
apoio á lectura, a biblioteca do instituto animou aos pais e
nais a que inclúan libros entre os agasallos de Nadal que
poidan facer e envioulles unha listaxe de libros recomendados,
elaborada por un grupo de profesores do centro, coa intención
de que lles poida servir de guía.
As familias recibiron tamén
un conto para nais e pais, Como quen bebe auga de Agustín
Fdez.
Paz, no que o autor fala da importancia que tivo o seu pai
no seu amor pola literatura e da necesidade da colaboración
entre as familias e a escola para reforzar o hábito lector dos
rapaces porque "a lectura axúdanos a entender o mundo e a
entendernos a nós mesmos, a enraizarnos no país en que vivimos
e a abrirnos ao variado mosaico das culturas do mundo. Axúdanos
a ser persoas máis tolerantes e solidarias. E tamén máis críticas,
máis auténticas, máis libres".
Biblioteca
Un río de
palabras
