O
rescate da avelaiona
A
fin de semana pasada Cristian Alonso e Daniel
Riveiro de 4º de ESO dedicáronse a buscar acomodo
para unha avelaiona (Strix aluco) nova e perdida. O animaliño apareceu preto
do campo de fútbol das Gaiandas. Despois de agardar se
marchaba por si só e comprobar que non tiña esa
intención levárono para a casa.
Mentres
facían xestións diante das sociedades protectoras de
animais puideron observar á
avelaiona:
durmida durante
o día e máis activa no solpor. Un pouco fartos de que
ninguén lles dixese que podían facer coa ave decidiron chamar ao SEPRONA
que axiña fíxose cargo do animal. Os gardas quedaron
de avisalos para ver como ceiban á avelaiona.
Vídeo do avelaiona
|
Entrega
de premios
Hoxe,
luns 25 de febreiro, a conselleira de Educación
entregará os dous premios á
innovación educativa sobre
temas transversais obtidos por senllos equipos de
profesores do instituto.
Os
equipos estarán representados pola profesora Susana
Paz
Díaz (premio no apartado Educación para a
igualdade en ambos sexos polo traballo Habelas
hainas. Mulleres na Ciencia) e pola profesora Margarita
Miramontes Castro (premio no apartado Educación
para o consumo polo traballo Proxecto Laranxa).
Cómpre sinalar que o Proxecto Laranxa contou coa
especial participación de toda a comunidade escolar.
|
Peitieiros.org
Peitieiros
conta cun sitio de seu na Arañeira. Trátase de Peitieiros.org
que está xestionado pola Comunidade de Montes en Man
Común. A comunidade naceu contra 1983 e hoxe conta
con 145 comuneiros e comuneiras.
Ademais da obrigada sección
de presentación, en Peitieiros.org podemos coñecer
todas as súas actividades e coñecer polo miúdo as
características propias da parroquia, incluíndo a súa
flora e fauna.
|
Punto de escoita
No Punto
de escoita hai novos discos a disposición de todos. Na sección de novidades:
e na sección de monográficos o primeiro disco de Frank
Zappa, Freak
out! (1966). As letras das cancións e a súa
tradución tamén están dispoñibeis.
Cómpre lembrar que os cascos hai que pedilos
na conserxería.
|
Chega
o Antroido!
O Antroido de 2007 xa está
aquí e ímolo celebrar coma sempre con festa
rachada.
O programa é o seguinte:
-
09:30-10:45 Os grupos de ESO
preparan os seus disfraces
-
10:45-12:00 Desfile polo pobo
-
12:00-12:30 Recreo (que cómpre
descansar)
-
12:30-15:00 Gran Baile e
Concurso de Disfraces
Haberá premios para os dous mellores disfraces de
grupos (mínimo de cinco persoas disfrazadas), para o grupo máis
participativo e para as dúas mellores caretas feitas polos
alumnos.
|
IES
Escolas Pro Val
Seguimos
visitando as casas virtuais dos nosos veciños. Hoxe, mércores
14 de febreiro, desprazámonos a traveso dos electrónicos
fíos da Arañeira ao IES
Escolas Pro Val. Atentos e atentas sobre todo
a información que dan sobre os seus ciclos
formativos. Moi interesante son tamén a sección
sobre a historia
do centro e a da estación
meteorolóxica instalada no instituto.
|
Terra
de Turonio na Arañeira
Malia
levar tempo na Internet, e por un descoido noso, aínda
non vós recomendáramos dar unha volta virtual ;-) pola
casa dos nosos veciños.
O IES Terra de Turonio
ten un estupendo
sitio na Rede no que podemos coñecer todas as súas
actividades (algunhas compartidas polos dous centros), o
seu funcionamento, como é o ciclo formativo que imparten,
galerías de imaxes...
|
Cambio de data
O concerto do grupo de segundo de bacharelato no
IES Pro Val
cambia a súa data. No canto do oito de marzo
será unha semana máis tarde, o día quince do mesmo
mes.
En canto as actividades do departamento de Música, o
profesor Sergio Álvarez comezará a impartir no instituto
un
curso
para profesores de Música.
|
Recomendación
Trátase
de La
Tierra a vista de satélite, unha web sobre
teledetección que pode ser aplicábel nas clases de Matemáticas,
Literatura, Xeografía, Bioloxía ou
Xeoloxía. Desde a web ensinan a interpretar as
imaxes obtidas polos satélites (por exemplo, as
publicadas en Google
Maps ou en Google
Earth), fai un percorrido polas cidades visitadas
por Phileas Fogg... Ademais
conta con unhas boas actividades interactivas e de
autoavaliación. Está publicado en español.
|
Concerto
para marzo
O
grupo de segundo de bacharelato ofrecerá un concerto
no IES Pro Val. Será contra o oito de
marzo, Día Internacional da Muller Traballadora, e coñeceremos
o programa nos próximos días.
|
Gondomar
na Galipedia
Gondomar ten o seu
anaquiño na Galipedia. Polo momento é un pequeno
artigo no que se apuntan os datos básicos do concello. A
Galipedia é un proxecto aberto á colaboración de todos
os interesados e xa conta con máis de 21.600 artigos. Se
queres colaborar e mellorar o artigo sobre Gondomar ou
calquera outro rexístrate e a traballar ;-)
|
Semana
de actividades: GUERRA CIVIL E REPRESIÓN
Do
5 ao 11 de febreiro poderá visitarse no IES Auga
da Laxe a exposición "Os mártires do mar"
promovida pola Consellería de Cultura da Xunta de
Galicia. Esta exposición itinerante, que percorreu
durante o verán do ano 2006 dezaoito portos do litoral
galego a bordo do vapor Hidria II, ofrece información
histórica e documentación novidosa sobre a represión
fascista exercida contra persoas e colectivos vencellados
ao asociacionismo mariñeiro que pretendían mellorar as
condicións de vida das xentes do mar.
Aproveitando
a presenza desta exposición no noso centro, desde o IES Auga
da Laxe preparamos unha semana de actividades
dirixidas principalmente ao noso alumnado pero abertas tamén
ás súas familias e, en xeral, a todas as persoas
interesadas: charlas-coloquio, exposición “A volta dos
nove”, selección de literatura e cine, club de lectura,
proxección dos documentais Aillados de Antón
Caeiro e Foi no 36 de Antía Paz, etc. Pretendemos
con esta iniciativa afondar desde unha perspectiva
educativa nos feitos que marcaron unha etapa fundamental
na nosa historia.
|
|