|
Vacacións!
Comezan
as vacacións de Nadal pero antes despediremos o ano como é
debido: fútbol (The revenge), karaoke, películas,
concurso de caligramas, campeonato de pimpón, o concerto
de Punk de millo...
todo durante a mañá de venres 22. Como é
lóxico remataremos
a xornada acudindo ás oficinas bancarias a cobrar O Gordo
da lotería de Nadal ;-)
Cos
cartos no peto podemos, seica, mercar algúns
agasallos máis, por exemplo, libros. Por iso, desde a
biblioteca do centro editouse a guía Un Nadal de libros, as
propostas de lectura dos departamentos.
Que
pasemos unhas felices vacacións!
Un Nadal de libros
|
Renovada
a sección dos Programas de Garantía Social
Benxamín
Rocha, titor dos Programas
de Garantía
Social, renovou totalmente
a súa sección. Desde agora está dispoñíbel toda a
información sobre as modalidades impartidas polo centro,
os destinatarios, formacións de grupos, certificacións
etc., completada cos Programas de Iniciación Profesional.
Programas
de Garantía
Social
|
Resumo
das actividades da semana do 11 ao 15
A
semana do 11 ao 15 de decembro estivo chea de actividades
de todo tipo. Comezou o luns pola mañá, coa presenza dos
regueifeiros Pinto d’Herbón e Luís
Caruncho. O mesmo
luns pola tarde visitounos o biólogo Daniel Soutullo e
deu unha conferencia sobre a clonación e as células nai.
Pola
noite e en Santiago de Compostela, Vichelocrego
Teatro representou A ópera do emprendedor no Teatro
Principal, dentro do Festival de teatro Agustín
Magán.
O
martes pola mañá, os compañeiros de 2º de ESO
visitaron a Casa das Palabras, a praia de
Samil, e mais a
Xunqueira do río Lagares, unha actividade organizada
polos departamentos
de Bioloxía e Xeoloxía, Educación
Física, Lingua
Galega e Lingua
Española. Co serán chegaba María Reimóndez,
convidada polo Club de Lectura, para falar de Usha,
o noso libro do mes,
e da súa ONG Implicad@s
no desenvolvemento, que traballa en proxectos de
cooperación en India e en Etiopía.
O
mércores, outro grupo de compañeiros desprazouse a
Santiago de Compostela para visitar o Parlamento de
Galicia, unha actividade organizada polo departamento
de Filosofía.
Finalmente,
durante toda a semana proxectouse a secuencia de imaxes
sobre os Dereitos humanos e mantívose a exposición dos
carteis co texto de cada un dos dereitos. A actividade
estivo organizada polo departamento de Relixión.
|
María
Reimóndez no instituto
Hoxe, martes 12, contra as 18:00 visitará
o instituto a escritora María Reimóndez, autora
de Usha,
o actual Libro do mes. Coa súa presenza na Biblioteca do
centro rematarán as actividades con Usha como Libro do
mes.
María Reimóndez, galega de Lugo, é tradutora e intérprete
de profesión. En 1994 foi traballar á India, máis en
concreto a Karnataka, en proxectos de cooperación ao
desenvolvemento. Contra 1998 fundou a ONG
Implicad@s no desenvolvemento, da que é presidenta,
para continuar e ampliar ese labor. Na actualidade esta
ONG desenvolve proxectos de cooperación na India e en
Etiopía.
Libro
do mes
|
Día dos dereitos das persoas
Esta semana conmemoramos o Día da Declaración
Universal dos Dereitos das Persoas. Máis de
duascentas das persoas que compartimos o día a día do
instituto posamos para a cámara co texto dun dos dereitos
por nós escollido.
A secuencia de imaxes podemos vela baixo o arco, á
entrada do Salón de actos.
|
Conferencia
de Daniel Soutullo
Convidado polo departamento
de Bioloxía e Xeoloxía, o biólogo e experto en
Bioética Daniel Soutullo vai visitar o noso centro
o luns 11 de decembro para pronunciar unha conferencia
sobre a Clonación e as células nai.
Daniel Soutullo é un
recoñecido especialista nas implicacións sociais da
bioloxía e en bioética, conferenciante nas máis
prestixiosas universidades galegas e españolas e autor
dunha ducia de libros sobre o tema, ademais de moitos
artigos e ensaios publicados en revistas especializadas.
Díptico
da conferencia de Daniel Soutullo
|
Constitución
do novo Consello Escolar
O
luns 4 de decembro quedou constituído o novo Consello
Escolar do instituto, o saído das eleccións parciais
celebradas na última semana. Podes coñecer aos seus
membros premendo
aquí para entrar na sección do Consello Escolar.
|
Rochas
de Galicia
No
sitio Rochas de Galicia existen dous apartados dedicados
á Serra do Galiñeiro e outro á zona que en Xeoloxía se
coñece como Complexo Monteferro-O Rosal.
No
primeiro
dos apartados da Serra do Galiñeiro descríbense as
rochas máis importantes. No
segundo publícanse microfotografías de minerais
pouco correntes atopados nesas mesmas rochas.
Na
sección
do Complexo Monteferro-O Rosal están colgadas unhas
fermosas imaxes das andalucitas e xistos característicos
desta zona.
|
O
tempo para a fin de semana
Chega
o xoves e comeza a chuvia de preguntas sobre como vai
estar o tempo a fin de semana. Velaquí dúas ligazóns
para facermos unha idea. A primeira é a Meteogalicia,
o servizo da Consellaría de Medio Ambiente e
Desenvolvemento Sostible; a segunda é ao famoso sitio
checo Windguru,
na súa páxina de Vigo. Un adianto: ambas as dúas
prometen vento e chuvia desde o venres e até o mércores
(festivo) da vindeira semana. Os peores días: venres 1 de
decembro, sábado 2 e martes 5.
A nosa recomendación:
paraugas, impermeábel e pasar pola biblioteca a buscar un
bo libro.
|
|
|