|
Campo da Feira s/n. Gondomar. Tfno.: 986 360 501 Fax.:
986 360 576. ies.augadalaxe.gondomar@edu.xunta.es
|
|
>ies>arquivo>2005>abril |
|
|
|
Premio Lingualaxe para Kerkus Xardinería
O
Equipo de Normalización Lingüística Balbordo
concedeulle o premio Lingualaxe a Kerkus Xardinería
polo uso que fai do galego en todas as súas
actividades (documentación, publicidade, contratos,
sitio web, etc.), como recoñecemento pola súa
contribución á recuperación social do uso da nosa
lingua.
O acto de entrega do galardón terá lugar o venres
29 de abril, ás 22:30, no Café Rañolas de
Gondomar. Despois da entrega do premio
actuará o grupo de música dos alumnos 2º de
bacharelato, dirixidos polo profesor Sergio
Álvarez, que interpretarán tanto música
renacentista e barroca como folc galego ou rock.
Balbordo
|
|
Axuda para libros
D.
Fernando Rodríguez, xefe da área administrativa do
centro, avísa que xa están na secretaría os
impresos para a solicitude de Axuda de Libros para os
alumnos e alumnas que se matriculen na ESO no
próximo curso.
A data para presentar as solictudes remata o 29 de
abril.
A
documentación a presentar e a seguinte:
1.
Impreso, que se recollerá no Centro.
2. Fotocopia dos D.N.I. dos membros da unidade
familiar maiores de 14 anos
3. Certificación bancaria onde figure o nome do
solicitante como titular ou co-titular da conta.
4. Xustificación de familia numerosa, se procede.
5. Xustificación se algún membro da unidade
familiar ten minusvalía, se procede.
6. Xustificación de separación ou divorcio dos
pais do solicitante, se procede.
Máis
información na Secretaría
|
|
Estrea do departamento de Música
O
departamento de Música
estrea o seu sitio.
Polo momento xa teñen
información sobre a composición do departamento, o
cursos que imparten e os concertos e a actividades que
van desenvolver ate xuño.
Departamento de Música
|
|
Caderno
de actividades d'El Quijote
O
departamento de Lingua e Literatura española
vén de colgar un
caderno de actividades sobre El Quijote.
Trátase dunha escolma de pasatempos, sopa de letras,
preguntas curtas... arredor da obra de Cervantes.
O caderno pode baixarse en formato pdf.
Caderno de actividades
El Quijote
|
|
Rallye
matemático
Os alumnos de 4ºA de ESO
quedaron clasificados en segunda posición no Rallye
Matemático Sen Fronteiras de Galicia. O xoves 14
de abril recolleron o seu premio na Facultade de Matemáticas
da Universidade de Santiago.
Os compañeiros conseguiron este segundo posto competindo
con sesenta institutos do resto do país.
|
|
II
Concurso de Teatro Inmediato
Vichelocrego
Teatro e mais o noso instituto organizan o
II
Concurso de Teatro Inmediato, a celebrar o venres 15
de abril ás 21:00. O teatro inmediato é a
representación de textos breves con tempo de
preparación limitado.
Os
participantes, xa inscritos desde o pasado luns, poden
recoller os textos no noso centro. Os concursantes
deberán presentarse á organización entre as 19.00 e
as 20.00 horas do venres.
A
asistencia á representación custa tres euros.
Bases do II Concurso de Teatro Inmediato
|
|
Convocatoria de claustro
O
vindeiro martes 19 de abril, ás 17:00, está
convocado o claustro de profesores. Entre outros
asuntos falarase do calendario fin de curso e a
aprobación do Proxecto Educativo do Centro (PEC).
Pola súa parte, o equipo
directivo informará aos compañeiros da súa
actividade.
|
|
O que pasa na biblioteca
Ademais de abrir un espazo
dedicado ao cuarto centenario da publicación do Quixote, tamén
avisamos dos novos contidos na sección da
biblioteca.
Trátase dunha relación de libros sobre temas históricos, outra sobre o
clásicos da literatura xuvenil, todos traducidos ao
castelán e unha terceira sobre poesía española e hispanoamericana. Por suposto, todos
os libros están na nosa biblioteca.
Tamén apuntamos o nacemento de O Cerne, unha sección que fai a súa estrea cunha
escolma de poemas en castelán.
|
|
Estrea do departamento de Lingua e Literatura galega
O departamento de Lingua e Literatura galega estrea o seu sitio.
Polo momento informan da composición do departamento
e dos niveis nos que imparten clase cada un dos seus
membros.
Tamén engaden ligazóns ás novidades da biblioteca en lingua e literatura galega
e literatura xuvenil en galego.
|
|
Liber
número 29
Xa está repartido o número 29
do boletín de biblioteca Liber. Neste ano de
aniversarios cómpre apuntar que hai dez anos que Liber
está entre nós.
O número 29 conta coas seccións
habituais: Chámame polo nome, información
sobre o Día das Letras, O xogo de busca e unha
nova dedicada á orixe das palabras.
Liber pode baixarse en formato pdf desde
a
sección da biblioteca.
|
|
Febre
de actividades e saídas
Nestas
semanas programadas pola vicedirección para
concentrar as actividades e saídas desde logo temos
de todo e onde escoller. Vexamos:
- O
domingo tres chegaron os de 4º de ESO da súa
viaxe á neve, a Andorra. É doado recoñecelos:
pel bronceada, agás na zona periocular, e algunha
que outra venda e escaiola.
- Os
de bacharelato andan por Londres nunha viaxe
organizada polo departamento de Inglés. Outro
grupo marchou a Mérida e Sevilla nunha viaxe
cultural organizada polos departamentos de Xeografía
e Historia e de Latín.
- No
centro están a desenvolverse unhas xornada da
nutrición e alimentación saudábel e prevención
de consumos irracionais para os alumnos e alumnas
de ESO.
- O grupo de Música de segundo de bacharelato
continúa cos seus recitais. Nesta ocasión
visitaron aos veciños do IES Pro Val.
Actividades 2004-2005
|
|
Novidades no departamento de orientación
Os
departamentos van ampliando as súas seccións
engadindo novos contidos.
O departamento de orientación
ofrece unha completa información de varios asuntos de
interese: vías de acceso á universidade, notas de
corte para o acceso aos ciclos superiores e estudos na
Universidade de Vigo, centros para adultos...
Podes baixar en formato pdf
ou ler na sección do departamento o documento que che
interese.
Departamento de orientación
|
|
Anteproxecto da nova lei de educación
A
ministra San Segundo presentou diante dos conselleiros
de educación o que é o anteproxecto da Lei Orgánica
de Educación (LOE). Ten varias novidades respecto ás
outras catro leis de educación aprobadas desde 1985:
a LODE (1985), LOXSE (1990), LOPEG (1995) e mais
a LOCE (2002). A ministra explicoulles aos conselleiros de educación
que na nova lei vai primar o reforzo da lectura, da escritura e
das matemáticas.
Os xornais dan conta dos resumos da súa exposición
pero como non hai nada mellor que ler os propios
documentos velaí vai a ligazón ao anteproxecto
da lei nas páxinas do MEC.
Tamén podes baixar
unha versión comprimida
(zip) ou o texto en
pdf, gardados na nosa sección Documentos
na que está recen engadido o Proxecto de Orientación Académica e
Profesional (POAP).
|